Vil Mozli potpisao za Mornar

Vil Mozli (32 god, 203cm), novi je centar Mornara!

Predsjednik barskog ABA ligaša Đorđije Pavićević reagovao je ekspresno nakon što su mediji prenijeli da je američki centar raskinuo ugovor sa Partizanom u čijem dresu je ostavio dubok trag minule dvije sezone.

Angažman jednog od najatraktivnijih igrača regionalnog prvenstva ima posebnu težinu i zbog toga što je za Mozlija, prema pisanju izraelskih medija, bio zainteresovan Makabi iz Tel Aviva. Mozli je upravo profil igrača kakav je Mornaru, pokazalo se to u prethodna četiri meča, bio potreban od početka sezone kako bi se popravila “unutrašnja igra”. U svim duelima ABA lige, naime, Barani su imali značajno manje skokova od rivala.

Amerikanac raskošnih atletskih sposobnosti trebao bi u ponedjeljak da stigne u Bar sa ekipom Mornara koja u nedjelju gostuje FMP-u u Beogradu. Prvi meč u dresu “Ponosa Bara” odigraće u nedjelju 24. oktobra protiv Crvene zvezde.

Mozli zbog povrede nije prošao pripreme sa Partizanom ali je od doktora dobio zeleno svjetlo da nastavi da igra košarku. U Partizan stigao pred početak sezone 2019/20, a u prošloj sezoni je na 16 mečeva ABA lige imao prosjek od 6,5 poena i 5,8 skokova. Na 12 utakmica u Evrokupu, Vil je imao prosjek od 4,4 poena i 4,7 skokova.

Tokom dvije sezone u Partizanu, osvojio je Kup Radivoj Koraća 2020. i ABA Superkup 2019. godine.